คาถาวิสุทธิมรรค

วิสุทธิมรรค ภาค 1

ยานิ โสตานิ โลกสฺมึ อชิตาติ ภควา
สติ เตสํ นิวารณํ
โสตานํ สํวรํ พฺรูมิ
ปญฺญาเยเต ปิถิยฺยเรติ ฯ

สีลนํ ลกฺขณนฺตสฺส	ภินฺนสฺสาปิ อเนกธา
สนิทสฺสนตตํ รูปสฺส	ยถาภินฺนสฺสเนกธา ฯ
ทุสฺสีลฺยวิทฺธํสนตา	อนวชฺชคุโณ ตถา
กิจฺจสมฺปตฺติอฏฺเฐน	รโส นาม ปวุจฺจติ ฯ
โสเจยฺย ปจฺจุปฏฺฐานํ	ตยิทํ ตสฺส วิญญุหิ
โอตฺตปฺปญฺจ หิรี เจว	ปทฏฺฐานนฺติ วณฺณิตํ ฯ
จตฺตาโร ปญฺจ อาโลเป	อภุตฺวา อุทกํ ปิเว
อลํ ผาสุวิหาราย	ปหิตตฺตสฺส ภิกฺขุโนติ ฯ

กิกีว อณฺฑํ จมรีว วาลธึ
ปิยํว ปุตฺตํ นยนํว เอกกํ
ตเถว สีลํ อนุรกฺขมานกา
สุเปสลา โหถ สทา สคารวาติ ฯ

ปาฏิโมกฺขํ วิโสเธนฺโต	อปฺเปว ชีวิตํ ชเห
ปญฺญตฺตํ โลกนาเถน	น ภินฺเท สีลสํวรํ ฯ

รูเปสุ สทฺเทสุ อโถ รเสสุ
คนฺเธสุ ผสฺเสสุ จ รกฺขตินฺทฺริยํ
เอเต หิ ทฺวารา วิวฏา อรกฺขิตา
หนนฺติ คามํว ปรสฺส หาริโน ฯ

กุลปุตฺตมานี อญฺโญปิ	ปพฺพชิตฺวาน สาสเน
มิตฺตตฺเถโรว ติฏฺเฐยฺย	วเร อินฺทฺริยสํวเร ฯ
อเนสนาย จิตฺตมฺปิ	อชเนตฺวา วิจกฺขโณ
อาชีวํ ปริโสเธยฺย	สทฺธาปพฺพชิโต ยตีติ ฯ

ธนํ จเช องฺควรสฺส เหตุ
องฺคํ จเช ชีวิตํ รกฺขมาโน
องฺคํ ธนํ ชีวิตญฺจาปิ สพฺพํ
จเช นโร ธมฺมมนุสฺสรนฺโตติ ฯ

อาวาโส จ กุลํ ลาโภ	คโณ กมฺมญฺจ ปญฺจมํ
อทฺธานํ ญาติ อาพาโธ	คนฺโถ อิทฺธีติ เต ทสาติ ฯ
ปิโย ครุภาวนีโย	วตฺตา จ วจนกฺขโม
คมฺภีรญฺจ กถํ กตฺตา	โน จฏฺฐาเน นิโยชเยติ ฯ
อิริยาปถโต กิจฺจา	โภชนา ทสฺสนาทิโต
ธมฺมปฺปวตฺติโต เจว	จริยาโย วิภาวเยติ ฯ
รตฺตสฺส หิ อุกฺกุฏิกํ ปทํ ภเว	ทุฏฺฐสฺส โหติ อนุกฑฺฒิตํ ปทํ
มุฬฺหสฺส โหติ สหสานุปีฬิตํ	วิวฏจฺฉทสฺส อิทมีทิสํ ปทนฺติ ฯ

กาเมสุ ฉนฺทํ ปฏิฆํ วิโนทเย
อุทฺธจฺจมิทฺธํ วิจิกิจฺฉปญฺจมํ
วิเวกปาโมชฺชกเรน เจตสา
ราชาว สุทฺธนฺตคโต ตหึ รเมติ ฯ

โส ตโต อารกา นาม	ยสฺส เยนาสมงฺคิตา
อสมงฺคี จ โทเสหิ	นาโถ เตนารหํ มโตติ ฯ
ยสฺมา ราคาทิสงฺขาตา	สพฺเพปิ อรโย หตา
ปญฺญาสตฺเถน นาเถน	ตสฺมาปิ อรหํ มโตติ ฯ
อรา สํสารจกฺกสฺส	หตา ญาณาสินา ยโต
โลกนาเถน เตเนส	อรหนฺติ ปวุจฺจติ ฯ
ยสฺมา นตฺถิ รโห นาม	ปาปกมฺเมสุ ตาทิโน
รหาภาเวน เตเนส	อรหํ อิติ วิสฺสุโต ฯ
อารกตฺตา หตตฺตา จ	กิเลสารีน โส มุนิ
หตสํสารจกฺกาโร	ปจฺจยาทีนมารโห
น รโห กโรติ ปาปานิ	อรหํ เตน วุจฺจตีติ ฯ
อภิญฺเญยฺยํ อภิญฺญาตํ	ภาเวตพฺพญฺจ ภาวิตํ
ปหาตพฺพํ ปหีนํ เม	ตสฺมา พุทฺโธสฺมิ พฺราหฺมณาติ ฯ
ยาวตา จนฺทิมสุริยา ปริหรนฺติ	ทิสา ภนฺติ วิโรจนา
ตาว สหสฺสธา โลโก	เอตฺถ เต วตฺตเต วโสติ ฯ
ภควาติ วจนํ เสฏฺฐํ	ภควาติ วจนมุตฺตมํ
ครุคารวยุตฺโต โส	ภควา เตน วุจฺจตีติ ฯ
ภคฺคราโค ภคฺคโทโส	ภคฺคโมโห อนาสโว
ภคฺคสฺส ปาปกา ธมฺมา	ภควา เตน วุจฺจตีติ ฯ
ตสฺมา หเว อปฺปมาทํ	กยิราถ สุเมธโส
เอวํ มหานุภาวาย	พุทฺธานุสฺสติยา สทาติ ฯ
ตสฺมา หเว อปฺปมาทํ	กยิราถ สุเมธโส
เอวํ มหานุภาวาย	ธมฺมานุสฺสติยา สทาติ ฯ
โย จ วสฺสสตํ ชนฺตุ	อคฺคึ ปริจเร วเน
เอกญฺจ ภาวิตตฺตานํ	มุหุตฺตมปิ ปูชเย
สาเยว ปูชนา เสยฺโย	ยญฺเจ วสฺสสตํ หุตนฺติ ฯ
ตสฺมา หเว อปฺปมาทํ	กยิราถ สุเมธโส
เอวํ มหานุภาวาย	สงฺฆานุสฺสติยา สทาติ ฯ
ตสฺมา หเว อปฺปมาทํ	กยิราถ สุเมธโส
เอวํ มหานุภาวาย	สีลานุสฺสติยา สทาติ ฯ
ตสฺมา หเว อปฺปมาทํ	กยิราถ สุเมธโส
เอวํ มหานุภาวาย	จาคานุสฺสติยา สทาติ ฯ
ตสฺมา หเว อปฺปมาทํ	กยิราถ สุเมธโส
เอวํ มหานุภาวาย	เทวานุสฺสติยา สทาติ ฯ

วิสุทธิมรรค ภาค 2

ยเมกรตฺตึ ปฐมํ	คพฺเภ วสติ มาณโว
อพฺภุฏฐิโตว โส ยาติ	ส คจฺฉํ น นิวตฺตตีติ ฯ
ชีวิตํ พฺยาธิ กาโล จ	เทหนิกฺเขปนํ คติ
ปญฺเจเต ชีวโลกสฺมึ	อนิมิตฺตา น นายเร ฯ
อปฺปมายุ มนุสฺสานํ	หีเฬยฺย นํ สุโปริโส
จเรยฺยาทิตฺตสีโสว	นตฺถิ มจฺจุสฺส นาคโมติ ฯ
ตสฺมา หเว อปฺปมาทํ	กยิราถ สุเมธโส
เอวํ มหานุภาวาย	มรณสฺสติยา สทาติ ฯ
ตสฺมา หเว อปฺปมตฺโต	อนุยุญฺเชถ ปณฺฑิโต
เอวํ อเนกานิสํสํ	อิมํ กายคตาสตินฺติ ฯ
ยถา ถมฺเภ นิพนฺเธยฺย	วจฺฉํ ทมํ นโร อิธ
พนฺเธยฺเยวํ สกํ จิตฺตํ	สติยารมฺมเณ ทฬฺหนฺติ ฯ
ยถาปิ ทีปิโก นาม	นิลียิตฺวาน คณฺหตี มิเค
ตเถวายํ พุทฺธปุตฺโต	ยุตฺตโยโค วิปสฺสโก
อรญฺญํ ปวิสิตฺวาน	คณฺหติ ผลมุตฺตมนฺติ ฯ
ทีโฆ รสฺโส จ อสฺสาโส	ปสฺสาโสปิ จ ตาทิโส
จตฺตาโร วณฺณา วตฺตนฺติ	นาสิกคฺเคว ภิกฺขุโนติ ฯ
สารทฺเธ กายจิตฺเต จ	อธิมตฺตํ ปวตฺตติ
อสารทฺธมฺหิ กายมฺหิ	สุขุมํ สมฺปวตฺตตีติ ฯ
นิมิตฺเต ฐปยํ จิตฺตํ	นานาการํ วิภาวยํ
ธีโร อสฺสาสปสฺสาเส	สกํ จิตฺตํ นิพนฺธตีติ ฯ
ตสฺมา หเว อปฺปมตฺโต	อนุยุญฺเชถ ปณฺฑิโต
เอวํ อเนกานิสํสํ	อานาปานสฺสตึ สทาติ ฯ
ตสฺมา หเว อปฺปมตฺโต	ภาวเยถ วิจกฺขโณ
เอวํ อเนกานิสํสํ	อริเย อุปสเม สตินฺติ ฯ
ขนฺตี ปรมํ ตโป ตีติกฺขา	นิพฺพานํ ปรมํ วทนฺติ พุทฺธา
ขนฺติพลํ พลานีกํ	ตมหํ พฺรูมิ พฺราหฺมณํ ฯ

โย อปฺปทุฏฺฐสฺส นรสฺส ทุสฺสติ
สุทฺธสฺส โปสสฺส อนงฺคณสฺส
ตเมว พาลํ ปจฺเจติ ปาปํ
สุขุโม รโช ปฏิวาตํว ขิตฺโตติ ฯ

อาสึเสเถว ปุริโส	น นิพฺพินฺเทยฺย ปณฺฑิโต
ปสฺสามิ โวหมตฺตานํ	ยถา อิจฺฉึ ตถา อหุนฺติ ฯ
จนฺทนรสานุลิตฺตา.	พาหา ฉิชฺชนฺติ ธมฺมปาลสฺส
ทายาทสฺส ปฐพฺยา	ปาณา เม เทว รุชฺฌนฺตีติ ฯ
อทนฺตทมนํ ทานํ	ทานํ สพฺพตฺถสาธกํ
ทาเนน ปิยวาจาย	อุนฺนมนฺติ นมนฺติ จาติ ฯ
สุปฺปณีตตรา โหนฺติ	ปจฺฉิมา ปจฺฉิมา อิธ
อุปมา ตตฺถ วิญฺเญยฺยา	ปาสาทตลสาฏิกา ฯ
อสุจิมฺหิ มณฺฑเป ลคฺโค	เอโก ตํนิสฺสิโต ปโร
อญฺโญ พหิ อนิสฺสาย	ตํ ตํ นิสฺสาย จาปโร
ฐิโต จตูหิ เอเตหิ	ปุริเสหิ ยถากฺกมํ
สมานตาย ญาตพฺพา	จตสฺโสปิ วิภาวินา ฯ
อารมฺมณํ กโรเตว	อญฺญาภาเวน ตํ อิทํ
ทิฏฺฐโทสมฺปิ ราชานํ	วุตฺติเหตุ ชโน ยถา ฯ
วณฺโณ คนฺโธ รโส โอชา	จตสฺโส จาปิ ธาตุโย
อฏฺฐธมฺมสโมธานา	โหติ เกสาติ สมฺมติ
เตสํเยว วินิพฺโภคา	นตฺถิ เกสาติ สมฺมติ ฯ
ทุเว สตสหสฺสานิ	จตฺตาริ นหุตานิ จ
เอตฺตกํ พหลตฺเตน	สงฺขาตายํ วสุนฺธราติ ฯ

เอกํ ปฏิจฺจ ติสฺโส จตุธา ติสฺโส ปฏิจฺจ เอกา จ
เทฺว ธาตุโย ปฏิจฺจ เทฺว ฉธา สมฺปวตฺตนฺติ ฯ

เอวํ มหานุภาวํ โยคิ-	วรสีหสฺส กีฬิตํ
เอตํ ธาตุววฏฺฐานํ	นิจฺจํ เสเวถ เมธาวีติ ฯ
ตสฺมาเนกานิสํสมฺหิ	กิเลสมลโสธเน
สมาธิภาวนาโยเค	นปฺปมชฺเชยฺย ปณฺฑิโตติ ฯ

ปทฺมํ ยถา โกกนุทํ สุคนฺธํ
ปาโต สิยา ผุลฺลมวีตคนฺธํ
องฺคีรสํ ปสฺส วิโรจมานํ
ตปนฺตมาทิจฺจมิวนฺตลิกฺเขติ ฯ

สหสฺสกฺขตฺตุมตฺตานํ	นิมฺมินิตฺวาน ปนฺถโก
นิสีทิ อมฺพวเน รมฺเม	ยาว กาลปฺปเวทนาติ ฯ
ภเววาหํ ภยํ ทิสฺวา	ภวญฺจ วิภเวสินํ
ภวํ นาภิวทึ กิญฺจิ	นนฺทิญฺจ น อุปาทิยินฺติ ฯ
อารมฺมณตฺติกา วุตฺตา	เย จตฺตาโร มเหสินา
สตฺตนฺนมภิญาณานํ	ปวตฺตินฺเตสุ ทีปเย ฯ

คาถาวิสุทธิมรรค

ความคิดเห็น

Restricted HTML